【北角皇都戲院拆卸在即|「真體字」老師傅笑看風雲過】

皇都戲院屹立於北角英皇道超過半世紀,獨特建築風格,屋頂建築拋物線設計,至今仍別樹一格。唯經歷過四級大火的洗禮,一蹶不振,天花板鋼筋外露,店舖逐漸人去樓空,去年終被強拍,歷盡半世紀滄桑,卻在踏入2020年代便畫上句號。漆黑的走廊僅餘的光亮—「京華招牌」亦將於五月塵埃落定。

「寫得一手靚字」可能不少人都做到,但將自己一生都投入「寫字」,並稱得為「文字師」,相信店舖「京華招牌」的東主歐陽昌絕對是一位表表者。位於皇都戲院內的「京華招牌」,由歐陽昌師傅開創已三十餘年,今年六十多歲的他強調引以為傲的字體—「真體字」。真體字源自唐朝,結構比正楷書更緊密,兼且有筆峰,有氣勢。

由磨墨、由寫字、吹乾、切割材料、安裝燈泡,製作招牌每一個步驟,歐陽昌師傅都親力親為。師傅強調真體字是正楷字的元祖,又以蝦來形容兩種字體,「真體字就係一隻生猛嘅蝦,有鬚有尾,好生猛!正楷字係剝左殼嘅蝦,易學啲,但係精粹不再。」歐陽師傅自小學習毛筆字, 草、行、篆、楷,基本的書法字體已走筆疾書,但獨愛真體字,年輕時儲錢,於北角皇都戲院自立門戶,專做招牌製作生意,「香港地有千幾個招牌係出自我手」歐陽師傅帶點傲氣地介紹。最風光時曾有多間分店,又住上數千尺豪宅,聘請傭人,十分風光得意,但九年皇都戲院一場四級大火,將一切扭轉。當時大火將店內製成品及貨品全數燒毀,收了客人的訂金,交不出貨,只好賣樓抵債,等一次過結束其餘分店的營業,遣散二三十名員工,獨守唯一皇都戲院內的總店至今。

皇都戲院被強拍,原本已經空蕩蕩的地下商場,更逐漸人去樓空,現時只剩下歐陽先生的招牌店,及門口的鞋店。人流更寥寥可數。「有時有啲後生仔嚟打下卡,影下相,冇人嚟喇…」歐陽師傅慨嘆着,但他最擔心的並不是生意,反而是擔心找不到人繼承這門手藝,令真體字失傳。「啲人過嚟,我都會幫佢哋寫啲字,寫喺紙又得,寫喺球拍或者木板都得!」,師傅期望更多人到來,希望將這字體得以傳揚。

大半生獻給書法,經歷過高山低谷,「文字師」歐陽昌一笑而過:「歐陽昌過得好好,唔係冇飯開,唔係冇生意」、「不過我都希望大家五月之前嚟同我傾吓計」。

Photo 攝: Billy Choy, Ivan Ng, Long Tse
Edit 撰: Billy Choy